Наша должност е во најбрз рок да ја почнеме парламентарната дискусија за уставните измени. Крајот на јули е моментот кога Собранието паузира, па сметам дека треба до тогаш да се случи првото гласање. Целата постапка треба да заврши до крајот на ноември, изјави вицепремиерот за ервопски прашања Бојан Маричиќ во емисијата „Студио 10“ на ТВ 24.
„Минатите уставни измени сме ги направиле за три месеци и сметам и дека и сега можеме така да направиме. Ќе се создат услови за двотретинско гласање. Целата постапка треба да заврши до крајот на ноември. Постои оптимизам дека европската перспектива може да стане реалност со заедничка одговорност на сите парламентарни партии, затоа што членството во ЕУ е одговорност на сите. Нема да се откажеме од дијалогот, дијалогот е најдобро средство и ќе се обратиме до секој пратеник, до секоја политичка партија затоа што сметаме дека сите имаат одговорност. Ако цела европска и светска јавност ни вели дека сега е вистинскиот момент и ние знаеме што се нашите обврски, вистинското место, вистинското време за отворање на дијалогот е сега, по 17 години во чекалната на ЕУ, државата и граѓаните немаат време за губење“, истакна Маричиќ.
Тој предупреди дека доколку уставните измени не се случат сега, наредната можност за ЕУ ќе биде по повисока цена.
„Доколку не се случат уставните измени сега, наредната можност ќе биде кој знае кога и таа ќе биде по многу повисока цена дека темите на кои што ќе се разговара за уставни измени ќе бидат многу пошироки од овие што се сега, кои се само техничко продолжување на низата на заедници во Преамбулата и нивно додавање на другите места во Уставот каде што се споменуваат заедниците“, рече вицепремиерот во „Студио 10“ на ТВ24.
Маричиќ додаде дека очекува ВМРО-ДПМНЕ своите позиции да ги стави во разумни и реални рамки, бидејќи со поставување на невозможни услови не можеме да дојдеме до решение.
„Ако нив им се битни избори, а на мнозинството пратеници им е важно да се случат уставните измени, ајде да ги направиме уставните измени и веднаш да влеземе во изборна кампања. Да го распуштиме Собранието и да одиме на избори“, порача тој и додаде дека предлогот прво избори, а потоа да се разговара за уставните измени ќе ја донесе земјата во ситуација како во 2008 година кога наместо да се реши спорот со Грција за да влеземе во НАТО, се одржаа избори и потоа 10 години не се решаваше тој проблем.
С.К.