Вицепремиерот Маричиќ во гостувањето на „Топ Тема“ изјави дека Владата има јасна цел и дека се водат од државните итереси, државничките мотиви и желбата да се однесе државата напред, потенцирајќи дека едниот интерес е да се зачува нашиот идентитет и јазик, а вториот, Северна Македонија, да стане членка на Европската Унија.
„Никој не може да ни го оспори идентитет и да ни го земе, без наша волја и желба, а кај нас нема никаква волја за бришење на нашиот идентитет, напротив ние инсистиравме македонскиот јазик да се најде во преговарачката рамка, и се најде. Ние инсистираме Фронтекс договорот да биде потпишан на македонски јазик без додавки и така ќе биде“, изјави Маричиќ.
Вицепремиерот Маричиќ смета дека ВМРО-ДПМНЕ го прави сето ова за да ја покрие и својата безидејност и својот став, потенцирајќи дека граѓаните многу пати се изјасниле дека се за членство во ЕУ, од 91-ва па наваму тоа е континуитет, како и сите политички партии.
„Меѓутоа едно е да сте како ВМРО-ДПМНЕ ‘за’ ЕУ и НАТО само на хартија, а друго е кога ќе дојдат овие тешки одлуки исто како за Преспанскиот договор да учествувате во носењето на тешките одлуки. Мислам дека ВМРО-ДПМНЕ се крие зад идејата за референдум само за да не преземе одговорност“, рече вицепремиерот Маричиќ.
Маричиќ во „Топ тема“ потенцираше дека никој не оди против волјата на граѓаните и дека нивната волја е да станеме членка на ЕУ како Македонци кои говорат македонски јазик и дека Владата таа агенда ја исполни, додавајќи дека не сакаат да се дел од несигурната и нестабилна агенда на Мицкоски и ВМРО-ДПМНЕ, кои инсистираа на референдум за Преспанскиот договор, а не учествуваа.
