Компанијата Мета, која ги поседува Фејсбук, Инстаграм и Ватсап, денеска почна да отпушта работници. Околу 11.000 работници или околу 13 отсто од вкупниот број вработени ќе бидат отпуштени. Ова е најголемото намалување на работните места во историјата на компанијата.
„Сакам да преземам одговорност за овие одлуки и за тоа како дојдовме овде. Знам дека ова е тешко за сите и особено ми е жал за погодените“, напиша сопственикот и основач на Мета, Марк Цукерберг во писмото до вработените.
Еден ден пред почетокот на отпуштањата, Цукерберг се сретнал со директорите за да разговараат за отпуштањата, пишува Њујорк Тајмс, цитирајќи две лица кои биле присутни на состанокот. Еден од тие луѓе за американскиот весник изјавил дека извршниот директор ја презел одговорноста за намалувањето на бројот на вработени, велејќи дека неговата компанија пребрзо растела.
Мета, исто така, ги откажа плановите за патување на вработените за да се осигура дека тие се достапни за состаноци со менаџерите доколку нивниот тим бил погоден од отпуштањата.
Мета имаше 87.314 вработени на крајот на септември, што е најголем број вработени во историјата на Мета. Во еден момент минатата година, Мета беше проценета на милијарда долари, но во текот на оваа година започнаа финансиските проблеми за Мета, кои кулминираа со отпуштања. Во јули, Цукерберг ги предупреди вработените дека компанијата доживува „еден од најлошите падови што сме ги виделе во поновата историја“ и најави замрзнување на вработувањата во септември.
Минатиот месец, тој предупреди дека „тимовите ќе останат стабилни или ќе се намалат во текот на следната година“ и додаде дека компанијата „ќе ја заврши 2023 година приближно со иста големина и малку помала организација отколку што е денес“.