Семејствата на трагично загинатите и повредените во пожарот во кочанската дискотека и оваа сабота маршираа за своите ангели по улиците на Кочани. Со фотографии во рацете од своите најмили и со солзи во очите тие чекореа во тишина. Тие повторно ги повикаа институциите да ја спроведат правдата во целост и да одговараат вистинските виновници за оваа досега најголема трагедија во земјава.
Ги повикаа судиите да судат право и тоа што поскоро.
Рутата беше иста како и секоја сабота. Точно во 18.05 часот маршот започна од Паркот на револуцијата, се движеше низ трговскиот центар, продолжи пред зградата на Општина Кочани, а заврши пред полициската станица, Основниот суд и обвинителството. Тоа се местата кои, според семејствата, сè уште немаат дадено одговор за бројните прашања поврзани со причините и одговорните за пожарот.
Семејствата на загинатите и овојпат укажаа на големи неправилности во истрагата за пожарот. Побараа одговорност од полицајците кои вечерта интервенирале во дискотеката, но и од директорот и медицинските лица кои работат во кочанската болница, затоа што работеле без потребни материјали и кислород, па не можеле да им пружат помош на настраданите. Побараа одговорност и од локалните власти и од инспекциите.
Тоа нема да ги врати нашите деца. Да беше затворена дискотеката затоа што немала дозвола, немаше да загинат нашите деца – рече една од мајките, која порача дека се бори за сите деца и за нивните и за другото дете.
Но, мајката до неа вели: „Јас немам ниедно. Едно имав и тоа ми го зедоа“.
Мајка на диџеј во дискотеката, кој е еден од загинатите во пожарот, се обрати до институциите во државата.
До сите институции кои ни ги убија децата, да ги погледнат овие раце. Овие раце што цел век печалеа, да ги исчуваат и нахранат своите деца да станат вистински личности за оваа држава. Но штета, некој го скрати тоа задоволство рече мајката.
Неутешната мајка извади лименка која ја нашла во ранецот на својот син и се намачка на лицето од пепелта која се уште стои на лименката.
Тие ги коментираа и изјавите на директорката на УЈП, која вчера кажа дека глобата за дискотеката што не работела по пропис за готовина, била платена, а затворено било само кафулето. Тие рекоа дека писмено ќе достават докази дека дискотеката не работела според закон и дека не исплаќала плати на сметка. Велат дека се сигурни дека се прикриваат работи.
Маршот се одржува секоја сабота и стана симбол на истрајноста на граѓаните во битката против институционалната рамнодушност.