Македонскиот филм „Медена земја“ и официјално стана кандидат за Оскар, откако Американската филмска академија го номинираше во двете категории: За најдобар документарец и за најдобар филм од неанглиско говорно подрачје. Режисери на филмот се Тамара Котевска и Љубомир Стефанов. Ова е првпат македонски филм да биде номиниран во две категории.
Единствениот македонски филм кој добил номинација за Оскар е филмот „Пред дождот“ на Милчо Манчевски , во 1995 година.
Меѓу петте номинирани за најдобар документарец покрај „Медена земја“ се и„Пештерата“, „Американска фабрика“, „Доба на демократија“ и „За Сама“. За најдобар странски филм номинации добија „Клетници“ од Франција „Корпус кристи“ од Полска, „Болка и слава“ од Шпанија и „Паразит“ од Јужна Кореја.
„Медена земја“ („Honeyland“) раскажува приказна за Атиџе, последната жена-одгледувач на диви пчели во Европа, која живее сама со својата мајка во централна Македонија. Главна идеја на филмот е да се прикаже припадноста на човекот кон природата и нарушување на природната рамнотежа преку судир на два различни начина на искористување на Земјините ресурси.
Продуцентот и монтажер на филмот е Атанас Георгиев, музиката ја направија членовите на групата „Фолтин“, а како музички супервизор се јавува Рана Еид од „ДБ Студиос“ (DB Studios) од Бејрут.
Церемонијата на доделување на престижната награда ќе се одржи на 9 февруари, ноќта во 02 часот по полноќ.