По неуспешните обиди на македонската полиција да ги лоцира Горан Грујовски и Никола Бошковски, двајцата обвинети во случајот на СЈО „Таргет“, македонската полиција побара распишување на меѓународна потерница по нив, информираат попладнево од Министерството за внатрешни работи.
Тие информираат дека вчера Апелацискиот суд им се јавил во 17 часот дека ќе ги достави наредбите за притвор на двајцата осомничени, но тие биле испратени дури по четири часа, односно во 21 часот вечерта, а според МВР, пред да ги добијат судските наредби тие не можеле да постапуваат.
Веднаш беше распишана национална потерница со која се спроведоа активности за приведување на осомничените. Tимовите на Министерството извршија проверка на објектите на адресите кои се пријавени како места на живеење на осомничените и проверки на повеќе локации на територијата на Република Македонија, поточно во Скопје, Велес и Охрид, за кои имаше оперативни сознанија дека осомничените ги користат за криење. Со оглед на тоа дека не беа пронајдени, МВР, согласно законските надлежности, побара од Судот согласност за распишување на меѓународна потерница и по наредба на Судот веќе е распишана меѓународна потерница за Г.Г. и Н.Б., велат од МВР.