Пет ресторани на „Мекдоналдс“ во Скопје се затворени веќе втор ден. Никој од сопствениците на македонската франшиза на најголемиот ланец за брза храна во светот не кажува што се случува.
На влезот на рестораните пишува дека тие се затворени од „интерни причини“, се шпекулира дека станува збор за вршење попис, како и за можност за менување на сопственик, но никој ништо точно не знае.
Франшизата за „Мекдоналдс“ рестораните во земјава ја поседува инвестициската групација М6, каде што доминантна сопственост има Свето Јаневски, поранешниот директор на „Пивара Скопје“, а во овие ресторани работат околу 200 лица. На вработените им е речено да не доаѓаат на работа во наредните денови, но никој не знае до кога.
Сепак, како и да се развиваат настаните, тешко може да се замисли дека Скопје на подолг рок ќе остане без Мекдоналдс ресторан. Ако актуелниот сопственик ги затвори постоечките, не би требало да има проблем некој друг да добие франшиза и да отвори други ресторани.
Ова, иако ситуацијата на Мекдоналдс во Македонија е поинаква споредено со развиените земји. Ако ланците за брза храна таму нудат најевтина храна, во земја како Македонија, каде цените на храната се најевтини во Европа, односно 49 отсто поевтини од просекот во Европската унија, на локалните угостители, сопствениците на ќебапчилници или на сендвичари не им е проблем да бидат конкурентни со Мекдоналдс кога станува збор за цената, но истовремено и да понудат храна на која локалното население е навикнато.
Покрај ова, во последно време во Скопје се појавуваат и комерцијални кујни, кои продаваат готови јадења од најразлични видови за употреба во домот и кои се сѐ попопуларни кај урбаното население, кое на овој начин за мали пари може да купи готов ручек после работа без да треба да готви и тоа по цени конкурентни на оние во Мекдоналдс.
Сепак, за Мекдоналдс во Скопје секогаш ќе има место – ако не за пет ресторани, тогаш сигурно барем за два или три.