Федералната војска на Мексико која започна офанзива против нарко-картелите и преземање на контролата во проблематичните градови и во државата Мичоакан, се судри со вооружените цивили кои одбиле да се разоружат.
Самоорганизирани групи на цивили, кои почнале да се вооружуваат пред една година и да заземаат градови кои ги контролирале нарко-клановите, почнале да стануваат се помногубројни, па федералната влада неодамна побара од нив да се разоружаат.
Одлуката за воена офанзива беше донесена во понеделникот, кога вооружени локалци зазедоа уште еден град и го опколија Апасинган.
Околу 200 федерални полицајци и војници упаднаа во Апасинган и ја разоружаа локалната полиција во градот, познат како упориште на нарко-бандата „Витези темплари“, пренесува агенцијата АФП. Претходно во судирот меѓу федералните сили и самоорганизираната цивилна полиција беа убиени четири луѓе, меѓу кои и едно дете.
Цивилната полиција одбива да го предаде оружјето се додека водачите на нарко-картелите не бидат уапсени. Цивилната полиција зазеде околу 20 градови во Мичоакан и покрај предупредувањето на федералната власт дека нема да го толерира нивното ширење.
Аналитичарите сметаат дека владата тактички им дозволила на самоорганизираните цивили да ги извршуваат безбедносните задачи се до сега, што носи и ризик, бидејќи во Колумбија цивилната полиција прерасна во паравоена насилна формација.
Безбедносната ситуација во Мичоакан стана најсилен предизвик за претседателот Енрико Пенја Нјети, кој пред 13 месеци кога дојде на власт вети пресметка со криминалните и со нарко-картелите, во што не успеа, па локалците почнаа да се самоорганизираат и да преземаат контролата над градовите во кои владееја нарко-бандите.
Во последните седум години во војната меѓу нарко-картелите убиени се над 77.000 луѓе.