Германскиот канцелар Фридрих Мерц гледа напредок во дипломатските напори за изнаоѓање начини за ставање крај на војната во Украина.
Сега имаме шанса за вистински мировен процес за Украина. Напредокот е сè уште мал, но шансата е реална – рече Мерц вечерва на заедничка прес-конференција со украинскиот претседател Володимир Зеленски во Канцеларството во Берлин.
Тој изјави дека сега има „голем дипломатски моментум, можеби најголем од почетокот на војната“.
Од вчера, во Берлин се водат интензивни и доверливи преговори меѓу украински, американски и европски преговарачи – извести Мерц.
Тој нагласи дека специјалниот пратеник на САД, Стив Виткоф, и Џаред Кушнер, зетот на американскиот претседател Доналд Трамп, „играат клучна улога“ во ова. Тој рече дека тие сега следат цели „за кои се согласуваат Украинците, Европејците и Американците“.
Фокусот е на прекин на огнот што го одржува суверенитетот на украинската држава. Ова мора да биде обезбедено со суштински безбедносни гаранции, рече Мерц. Она што САД го ставија на маса во Берлин во однос на правни и материјални гаранции е „навистина извонредно“ – оцени Мерц.
Работиме на прекин на огнот заедно: Украинците, Европејците и Американците. Тоа беше нашето заедничко разбирање вчера и денеска.