Министерката за надворешни работи на Сојузна Република Германија Аналена Бербок во четвртокот престојуваше во официјална посета на Северна Македонија на покана на нејзиниот колега шефот на дипломатијата Бујар Османи.
Главниот фокус во разговорите беше пристапувањето на земјата во ЕУ, а особено потребата за уставни измени како неопходен чекор кон Унијата.
Во таа насока е и соопштение за печат на министерката Бербок, пред нејзиното поаѓање за Северна Македонија, објавено на Фејсбук страната на Амбасада на Сојузна Република Германија во Скопје коешто ви го пренесуваме во интегрална форма.
Местото на Северна Македонија е исто како и местото на нашите други партнери на Западен Балкан во Европската Унија. Дека сме сериозни во врска со тоа, за тоа не би требало да постои повеќе никаков сомнеж најдоцна од официјалниот почеток на пристапните преговори со ЕУ во јули 2022 година. Големите надежи и очекувања што луѓето во Северна Македонија ги поврзуваат со пристапниот процес за нас претставуваат и шанса и опасност истовремено: опасност, бидејќи може да ги изгубиме Македонките и Македонците за Европа доколку ние како ЕУ ги разочараме нивните очекувања и покрај сиот напредок и делумно болните компромиси што ги направија во изминатите 17 години. Шанса, бидејќи сите учесници во процесот на проширувањето на ЕУ се свесни за што станува збор во суштина: за иднина во европското семејство, за регион со стабилна благосостојба и мир, за самоопределба. Можам добро да разберам дека токму околу прашањата за сопствениот идентитет, сопствената историја, јазик и култура, дискусиите во Северна Македонија се водат со срце и страст – и кај нас тоа не е поинаку и важи секако токму за начелните прашања како промена на уставот. Но, искуството покажува: во такви ситуации вреди да се стави настрана партиско-политичката калкулација, човек да се води од јасната цел и одлучно да се бори за тоа. Широка поддршка во Собранието на Северна Македонија за промена на уставот би испратила сигнал не само во самата земја, туку и надвор од неа, во целиот регион: апсолутно го сакаме приемот во ЕУ и правиме сè што е потребно од наша страна за тоа.