„Ние ќе учествуваме, кандидат е доктор Мевмед Џафери, членот на Извршниот комитет на ВМРО-ДПМНЕ. Тоа е почитуван човек, родител, семеен човек итн. Мислам навистина е почитуван човек во средината таму и очекуваме дека ќе победи убедливо“, рече денес лидерот на ВМРО-ДПМНЕ Христијан Мицкоски одговарајќи на прашањето дали ВМРО-ДПМНЕ ќе учествува во локалните избори во Маврово и Ростуше.
Мицкоски додаде дека ВМРО-ДПМНЕ ќе учествува исто така и на локалните избори во Тетово за избор на нов општински совет.
„Исто така имаме и своја листа и на локалните избори во Тетово за совет кои што исто така ќе се случат на 20-ти август. А, и очекуваме бројот на советници да го зголемиме според последните мерења на јавното мислење“, појасни Мицкоски.
Претседателот на ВМРО-ДПМНЕ истакна дека се надева дека изборите во Маврово и Ростуше ќе успеат бидејќи во тој период многу печалбари се враќаат тогаш.
Општините се без градоначалник уште од редовните локални избори во октомври 2021 кога не беше достигнат законскиот излезен праг за успешност на изборите. Од тогаш имаше уште еден неуспешен обид за што известуваше НоваТВ да се избере градоначалник, поради одбивањето на ВМРО-ДПМНЕ да учествува на изборите а СДСМ од чии редови беше назначен владин повереник, се откажуваше од избори поради можноста тие да бидат неуспешни само со нивен кандидат. (Р.Н.)