Откако премиерот Христијан Мицкоски ја отвори можноста за предвремени парламентарни избори доколку тоа го побара опозицијата, експресно реагираше Демократската унија за интеграција (ДУИ) со барање за итно распуштање на законодавниот дом.
Иако со месеци инсистираше на редовни избори во 2028 година, променетата реторика на Мицкоски и неговата изјава дека власта нема да седи на страна „како кукавица“ доколку се побара изборно соочување, наиде на брз одговор од Мала Речица.
„Го поздравуваме ставот на премиерот. Конечно и тој разбра дека оваа состојба е неодржлива и дека на земјата ѝ е потребен нов политички мандат“, порачаа од ДУИ.
Од партијата оценуваат дека актуелната Влада го загубила легитимитетот, обвинувајќи ја за европска изолација на државата, деградација на меѓуетничките односи и кршење на Охридскиот договор.
ДУИ сега бара зборовите на премиерот веднаш да се преточат во дела.
„Бараме во рок од неколку дена да се одреди најбрзиот уставен рок и да започнат изборните подготовки. Ако понудата е сериозна, нема причина за одложувања и политички калкулации. Опозицијата го даде својот одговор – ДУИ е подготвена. Нека се распушти Собранието, нека се одреди датумот и да одиме на избори“, се вели во соопштението на партијата.
И покрај жестоките политички препукувања, сѐ уште нема конкретна институционална иницијатива ниту меѓупартиски договор за предвремено гласање. Во јавноста останува дилемата дали најавите се вовед во вистински избори или станува збор само за тактичко тестирање на јавноста и обид за мобилизација на сопственото гласачко тело од двете страни.