Со сведоци и аудио снимки СЈО ќе докаже дека обвинетите ги сториле кривичните дела – рече Специјалната јавна обвинителка Фатиме Фетаи, во воведното обраќање за случајот „Титаник2“ во кој се обвинети Сашо Мијалков, Мендух Тачи, и поранешните членови на ДИК – Бедредим Ибраими, Анета Стефановска, Влатко Сајковски и Сашо Срцев за изборни неправилности на локалните избори во 2013.
Фетаи кажа дека Сашо Мијалков и Мендух Тачи со своето политичко влијание овозможиле пратеникот Васил Пишев да ја продолжи политичката битка за градоначалник на Струмица, а воедно за тоа биле потрошени и дополнителни буџетски средства. Мијалков под влијание на Тачи на својот сопартиец од ДИК Ибраими му кажал да гласа за приговорот на ВМРО-ДПМНЕ за изборот на градоначалник на Струмица.
„Она на што треба да се посвети внимание е мотивот на обвинетите кој се базира на чувство на сопствена политичка недопирливост и страв од политички пораз дека оној кој ќе не победи на локално ниво утре, е прва опасност на централно ниво“ рече Фетаи.
Поранешниот шеф на УБК Сашо Мијалков рече дека го разбира обвинението против него, иако како што кажа воведниот говор на обвинителството бил помешан со политика.
„Повеќе политика отколку право“ – рече Мијалков кој се изјасни дека не е виновен. И другите обвинети се изјаснија дека не се чувствуваат виновни.
Судењето ќе продолжи на 22 мај со воведни говори на адвокатите на обвинетите.