Уставниот суд го отфрли барањето за заштита на слободи и права поднесено од Антонио Милошоски преку негов правен застапник.
Пратеникот од ВМРО-ДПМНЕ и поранешен шеф на дипломатијата се жалеше до Уставниот суд поради прифатен обвинителен акт против него. Меѓутоа, Уставниот суд оцени дека обвинителниот акт не претставува поединечен акт со кој се одлучува за поединечни слободи и права за граѓаните, односно за ограничување или одземање на одредени слободи и права гарантирани со Уставот, туку станува збор за поднесок, односно едностран процесуален акт кој е основа за водење на кривична постапка, се вели во денешното соопштение што го издаде Уставниот суд.
Уставниот суд наведува и дека е потребно Милошоски да ги образложи причините поради кои бара заштита, актите или дејствата со кои му се повредени слободите, потоа како што се вели фактите и доказите на кои се заснова барањето, како и други податоци потребни за одлучувањето на Уставниот суд, што со овој предмет не е случај, вели Судот.
„Судот утврди дека не се исполнети процесните претпоставки од наведените одредби од Деловникот на Уставниот суд, за мериторно постапување и одлучување по барањето за заштита на слободите и правата“, се вели во одлуката.
Милошоски до Уставниот суд поднел приговор дека му е повредено правото на недискриминација по основ на политичка припадност и политичко уверување, поради обвинение кои било поднесено против него а потоа и прифатено од судија во Основниот кривичен суд Скопје. Пратеникот тврдел дека одбивањето на неговите приговори на обвинението е со неетички и малициозни причини и со цел да му се врши притисок и политичка дискредитација затоа што е пратеник од редовите на најголемата опозициска партија ВМРО ДПМНЕ.