Денеска беше одбележен 17 Март – Денот на крводарителството и 77 години од постоењето на Црвен крст на РСМ.
Црвен крст во соработка со Институтот за трансфузиологија во текот на изминатата 2021 година организирале 683 крводарителски акции, преку кои биле обезбедени вкупно 53.133 единици крв. Од Црвениот крст aпелираат дека едно дарување крв може да спаси дури три животи.
Министерот за здравство Беким Сали истакна дека на годишно ниво Министерството изготвува посебна програма за организирање и унапредување на крводарителството во државата, а за оваа година буџетот на програмата за крводарителството изнесува 45 милиони денари.
„Токму Црвениот крст е наш постојан партнер во реализирање на активностите од програмата за континуирана на здравствено, воспитна и мотивациска програма меѓу населението, непосредна подготовка на крводарителските акции и изготвување информативни материјали, учество на волонтери, како и доделување признанија на крводарителите. И во време на пандемијата со Ковид-19 непречено се одвиваат крводарителските акции со целосно почитување на протоколите за заштита. Со акциите на Црвениот крст и Институтот за трансфузиона медицина само минатата година се собрани вкупно 53.133 единици крв, што е повеќе од планираните 52 илјади единици крв“, рече Сали.
Претседателот на Црвениот крст на Северна Македонија, Ромел Велев, истакна дека во текот на пандемијата со Ковид-19, дарителите на крв биле постојано повикувани да продолжат со нивната значајна улога во поткрепа и одржување на нашиот здравствен систем.
На одбележувањето на годишнината на Црвен крст беше промовирана кампањата „Првата помош спасува живот“, чија цел е 25 илјади ученици од основни и средни училишта во државата да се оспособат за правилно и навремено пружање на прва помош.
На 16 општински организации на Црвениот крст кои го исполниле планот за крводарувањето во 2021 година им беа врачени признанија.
(Извор: МИА)