Премиерот Зоран Заев денеска изјави дека се уште не е одлучено кој ќе биде министер за здравство, но очекува решението да биде донесено до крајот на месецов.
Одговорајќи на новинарски прашања по потпишувањето на договорите за поддршка на млади земјоделци во МЗШВ, Заев истакна дека денеска повторно имал средба со коалициските партнери, а вчера разговарал и со Зијадин Села и Али Ахмети.
– Се работи за многу сериозен ресор. Реков дека до крајот на месецот ќе гледаме да ги донесеме одлуките. Десет дена откако се официјално прогласени изборите за завршени, интензивно преговараме. Секој момент го користам, час поскоро или ден поскоро да го избереме и ова министерско место и да го пополнме испразнетото министерско место за странски инвестиции, како и заменик министерот кој стана градоначалник на Чаир.
Пред неколку дена од Алијансата за Албанците за НОВА изјавија дека ова министерско место по редот на нештата им припаѓа на нив, а нивниот кандидат доколку биде назначен само би продолжил таму каде што застана Таравари.
Неофицијално, Зијадин Села неделава имал разговор со премиерот Заев и го понудил нивниот кандидат, Вулнет Ферати.
Од ДУИ пак, рекоа дека во моментот немаат сериозни претензии кон ова министерство, како и дека се уште не е разгледано ова прашање во партијата.
„Се уште не знаеме ништо, но и немаме некои посебни претензии кон ова министерство. Ќе видиме што ќе одлучат органите на партијата“, изјави за НОВА Артан Груби, шеф на кабинетот на Ахмети.
Не се знае дали е ова нов момент во партијата или работите се разбрануваа по сериозните препукувања на двајца кандидати како претенденти за министерско место.
Изминатите денови се калкулираше со повеќе имиња, меѓу кои и еминентни лекари како предлог од СДСМ. Нема информации до каде е овој процес кој веројатно повторно се развлече поради ангажманите и патувањата на премиерот Заев.
Пред една недела самиот премиер изјави дека избираат човек на кој народот ќе му верува, а не партија. Според она што до сега се дознава од партиски извори, но и се шпекулира во јавноста очигледно, ќе се избира партија. На кого ќе падне изборот останува да се почека уште неколку дена. Дотогаш, министерското столче и натаму останува празно.