Министерот за правда Кренар Лога со писмо ја информира меѓународната заедница за неспроведувањето на пресудите на ЕСЧП од страна на Бугарија.
Лога испрати дописи до амбасадата на САД во Скопје, Делегацијата на ЕУ, Мисијата на ОБСЕ и Програмската канцеларија на Советот на Европа со кои ги информира за неспроведувањето на пресудите на Европскиот суд за човекови права од страна на Република Бугарија.
Во дописот кој е испратен заедно со 14-те пресуди, е посочено дека Министерството за правда бара поддршка од меѓународната заедница во делот на унапредувањето и заштитата на човековите права. Исполнувањето на оваа цел подразбира постоење на континуирана заложба и за доследно почитување на меѓународните обврски кои Република Северна Македонија ги има превземено како земја која моментално е во процесот на евроинтеграции.
Почитувањето на меѓународни документи е исклучително важен сегмент за кој е неопходно да се залагаат особено земјите членки на ЕУ, но и земјите кои претендираат да добијат членство во ЕУ.
Меѓународната заедница претставува исклучително важен партнер на Македонија кој е вклучен во сите реформски процеси и партнер кој несомнено цврсто и доследно се залага за почитување на владеењето на правото, се наведува во соопштението од Министерството за правда.
Министерството за правда смета дека е од особена важност да се актуелизира прашањето за неспроведувањето на пресуди на ЕСЧП, истакнувајќи ја потребата од поддршка од меѓународната заедница за доследно спроведување на пресудите на судот.