Изградбата на Коридорот 8 и Коридорот 10-д е стратешки проект од национален интерес за Северна Македонија а придобивките од неговата изградба се огромни, порача денес Министерството за транспорт и врски среде политичките препукувања околу оваа инвестиција.
Министерството уште еднаш нагласи дека поврзувањето на земјата со регионот и Европа, што ќе го овозможат коридорите, обезбедува рамномерен регионален развој, раздвижување на економијата на земјата, подобрување на бизнис климата, пораст на странски инвестиции, побрз трансфер на луѓе и стоки, отворање нови пазари и подобро поврзување со меѓународните и трговски партнери.
„Ова значи и обезбедување на нови работни места за нашите граѓани бидејќи трасите каде што ќе се градат делниците отвораат дополнителни можност за изградба на нови објекти од различни дејности, како што се бензиски пумпи, ресторани, хотели, одморалишта, деловни објекти. Тоа се нови можности за отворање на нови работни места, за вработување на жителите од регионите каде што ќе поминуваат автопатските делници од коридорите. Од друга страна тоа се нови даночници и нови приливи во државната буџетска каса“, порача Министерството.
Се појаснува и дека проектот има за цел да вработи што е можно повеќе работници од домашниот пазар на трудот, кои ќе имаат можност и за обука од страна на изведувачот.
„Ангажманот на работна сила за изградба на Коридорот 8 и Коридирот 10-д ќе се реализира согласно постоечкиот закон, односно, согласно Законот за утврдување јавен интерес, со кој се регулира ангажманот на работници и јасно стои обврската, стратешкиот партнер да користи најмалку 51% од локални ресурси“, појаснуваат од Министерството по тврдењата на опозицијата дека проектот ќе вклучи 70 посто странска работна сила.
Ако нашата земја има доволно локални ресурси, односно работна сила, бројот на локално ангажираните ресурси може да биде и поголем од 51 отсто, велат од Министерството.
„Работниците кои ќе бидат ангажирани на овој проект, а согласно потребите во градежништвото ќе извршуваат прекувремена работа, секој прекувремен час ќе им биде исплатен со 35 отсто повисока сума согласно законот и колективниот договор. Секој работник ќе потпише изјава дали сака да работи прекувремено, и доколку не сака нема да биде принуден со сила да работи прекувремено. Согласно законот, работниците ќе имаат и слободен ден“, велат од Министерството.
„Потенцираме дека, прекувремената работа не значи 60 часа неделно, но и не значи дека во текот на целата година ќе има прекувремена работа, тоа ќе зависи од временските услови за работа на терен, односно поинтензивно ќе се работи во месеците на пролет, лето и средина на есен, но не 60 часа неделно. Истовремено, прекувремената работа ќе зависи и од активностите и процесите на работа на трасите, што значи, дека ќе има и денови кога воопшто нема ниту да има потреба од прекувремена работа“, појаснуваат.
Министерството за транспорт и врски потсети и дека овие инфраструктурни инвестиции се траен влог и наследство за идните генерации.