Новата влада на седница на 7 јули донела одлука сите репрезентативни трошоци за именуваните лица да се ограничат на 30.000 денари за сите угостителски објекти кои се во надлежност на Службата за општи и заеднички работи и 500 евра месечно за угостителсли објекти за службени патувања, информираат од Владата.
„Имено, членовите на Владата (Претседателот на Владата, Шефот на канцеларијата на премиерот, Заменик претседателот на владата задолжен за економски прашања, министрите за ресор во владата, Генералниот Секретар и Заменик генералниот секретар), и други именувани лица опфатени со овој правилник, имаат право на надомест во висина од 30.000 денари месечно, за угостителски услуги во угостителските објекти во надлежност на Службата на општи и заеднички работи на Владата на РМ, и надомест во висина од најмногу 500 евра, месечно, за угостителски услуги за време на службени патувања во странство“, велат од Владата.
Се уште не се знае дали во претходната Влада овие трошоци биле ограничени на некој начин, ниту пак што се смеело да се признае за репрезентативен трошок.
Не се знае ни дали постои еден Правилник за сите институции и министерства или пак секоја институција носела свој интерен Правилник.
Одлуката на Владата доаѓа откако во јавноста се обелоденија сметките на претходните функционери на коо можеше да се види како тие со граѓански пари јаделе и пиеле без мерка.