Пратеникот Панчо Минов, кого ВМРО-ДПМНЕ го повика да свика седница на Комисијата за деловнички и мандатно имунитетни прашања како нејзин претседател за да му се изрече јавна опомена на собранискиот спикер Талат Џафери поради наводно изречените пцости кон вработени во законодавниот дом, во изјава за Нова вели дека таквото барање партијата треба да го достави во писмена форма и да обезбеди докази дека е направен прекршок на Етичкиот кодекс.

Комисијата, во зависност од тежината на прекршокот, освен јавна опомена може да донесе одлука и за суспензија на пратеник во траење од еден месец или забрана да претседава со работните тела на Собранието во траење до еден месец.

– Сигурно дека ќе свикам седница на Комисијата и ќе отвориме постапка, но за тоа треба прво да има писмена пријава и писмени докази, вели Минов за Нова.

Во ВМРО-ДПМНЕ велат дека ќе ги почитуваат процедурите и дека ќе поднесат иницијатива за да се свика седница на Комисијата за имунитетни прашања, но се вчудоневидени зошто тоа досега не го направи нејзиниот претседател Панчо Минов, на негова иницијатива кога навредите и пцостите што ги изрече Џафери, велат од ВМРО-ДПМНЕ, беа искажани пред сведоци кои ќе сведочат и на седница, а доказите се достапни преку аудио запис дури и за јавноста. Настрана што, пратениците не смеат да дозволат да го премолчат прекршувањето на Етичкиот кодекс во законодавниот дом од било кого, а камоли од претседателот на Собранието, кој е втор човек по функција во државата.

Пратеникот Антониот Милошоски вели дека Џафери сторил тешка повреда на Етичкиот кодекс затоа што не смее пратеник да врши притисок на државните службеници и на другите вработени во Собранието во извршувањето на нивните работни задачи, настрана што тоа тој го прави на вулгарен и недоличен начин. 

Тој се повикува на членот 14 од Кодексот за етичко однесување на пратениците кој е усвоен во 2018, а како прв предлагач е потпишан  пратеникот Талат Џафери.

– Истиот пратеник од позиција на претседател на Собранието на 11 мај, како што слушна целата јавност, со крајно вулгарен речник врши притисок кон вработените во службата за седници во Собранието, пцуејќи ги нивните мајки и омаловажувајќи го нивното достоинство. Ова е досега најтешката повреда на Етичкиот кодекс, која мора да биде санкционирана, вели Милошоски.

 На аудио снимката, која била снимена тајно може да се слушне како маж извикува навредливи и недолични зборови, наводно кон вработени во собраниските служби. Оваа аудио снимка беше објавена на Твитер.

С.М.