Владата на Република Северна Македонија и Министерството за информатичко општество и администрација (МИОА), најодговорно тврдат дека во земјава нема пуштено во употреба 5G мрежа.
„Ги информираме граѓаните дека надлежните институции немаат спроведено постапка за доделување на фреквенции за 5G мрежа. Од тука сите грижи за ефектите од 5Г мрежата врз здравјето на граѓаните се неосновани“, се вели во соопштението на МИОА.
Информациите кои се појавија во јавноста дека деновиве се прават тестирања, се вели во дописот, се неточни.
„Во нашата држава до сега се направени само две тестирања и тоа едно во 2018 година во органичени и строго контролирани лабораториски услови и второ тестирање во 2019 година на ограничен простор. Ги повикуваме сите извори на лажни вести, да престанат со објавување на дезинформации кои имаат единствена цел да создаваат недоверба и паника кај граѓаните“, порачуваат од МИОА.