Лидерот на опозициската ВМРО-ДПМНЕ, Христијан Мицкоски изјави дека досегашните партнери во коалицијата за „Обнова на Македонија“ сигурно остануваат дел од неа и за претстојните предвремени парламентарни избори на 12 април. Но, истовремено, нагласи дека се водат преговори и со други политички субјекти кои се заинтересирани да се приклучат во блокот, иако рече дека „се мали шансите“ за предизборна коалиција со некоја од албанските партии, по примерот на денеска официјализираниот договор за соработка меѓу СДСМ и БЕСА.
Не открива повеќе детали за тоа што преговараат и договараат со политичките партии и најави дека кога ќе има официјална коалиција ќе има заеднички договор и тој ќе биде презентиран пред јавноста.
„Во текот на наредната недела ќе излеземе со повеќе детали. Политичките партии кои беа дел од коалицијата „Обнова на Македонија“ остануваат, но исто така има и политички субјекти кои преговараат со нас. Нашите позиции се јасни, принципиелни и од тие позиции отстапување нема. Слушнавме ставови и барања на различни политички субјекти кои преговараат со нас, ние ги презентиравме нашите позиции“, изјави Мицкоски пред почетокот на панелот за очекувањата и предизвиците за бизнисот, во организација на Делегацијата на германското стопанство во нашата земја.
Прашан дали ќе има некоја од албанските партии во нивната коалиција, Мицкоски одговори дека во моментот за тоа се мали шансите, а во коментар на денеска официјализраната коалиција меѓу СДСМ и БЕСА одговори „Со среќа нека им е“.
„Мали се шансите во моментот да има такво нешто предизборно, а постизборно рековме да почекаме да се случи најголемата победа во независна Македонија. Коалицијата на ВМРО-ДПМНЕ, „Обнова на Македонија“ со народот, а потоа доколку на политичка и проектна основа имаме какво било коалицирање со кој било политички субјект тука сме, подготвени сме да разговараме и да создадеме една коалиција“, рече Мицкоски.
Прашан дали ВМРО-ДПМНЕ ќе продолжи со протестите, Мицкоски рече од СДСМ се исплашени и оти како изговор го користат корона-вирусот.
„Најсреќни би биле исплашените од СДСМ да го користат корона-вирусот како изговор за ВМРО-ДПМНЕ да не го мобилизира народот и претпоставувам дека тие молеа Бога да се случи сето ова за да може ВМРО-ДПМНЕ да не излегува заедно со народот и да протестира против она лицемерие кое денеска е секојдневие во Македонија, за жал“, рече Мицкоски.
На новинарско прашање истакна и дека се подготвува за утрешниот дуел со претседателот на СДСМ Зоран Заев.
„Му посветувам должно внимание и сериозно му приоѓам“, рече Мицкоски.