Претседателот на ВМРО ДПМНЕ Христијан Мицкоски на германската канцеларка Ангела Меркел и рекол дека партиските тела наредната недела ќе донесат одлука за ставот на ВМРО ДПМНЕ за референдумот.
„Средбата помина во исклучително пријателска атмосфера помеѓу две сестрински партии кои се дел од Европската Народна партија. Разговаравме околу актуелната политичка ситуација во државата, акцент беше ставен на референдумот кој ќе се случи на 30 септември. На средбата ги истакнав позициите кои ВМРО-ДПМНЕ ги имаше во изминатиот период за тоа зошто ВМРО-ДПМНЕ не може да го прифати овој Договор и зошто ВМРО-ДПМНЕ не се согласува со содржината на овој Договор. Ги повторивме истите позиции и ја информиравме канцеларката Меркел за нашата акција во рамки на т.н. „Лето за Македонија“ рече Мицкоски.
Тој не сакаше да коментира која била пораката што му ја пренела канцеларката Меркел и рече дека не е пристојно да го пренесува она што е лично кажано.
Претходно на прес конференцијата во Владата, Меркел рече дека на Мицкоски ќе му каже дека „за клучни прашања треба да има национална, заедничка одговорност“.
Германската канцеларка не се сретна со претседателот на државата Ѓорѓе Иванов.
Меркел ги повика граѓаните на 30 септември да гласаат. „Не останувајте дома на ваков историски ден, излезете и кажете што мислите за иднината на вашата земја“рече Меркел и јасно порача дека без успешен референдум нема влез во НАТО и ЕУ.