Референдумот е шанса да се отворат вратите и вие да станете дел од европското семејство. Вие сте поканети да станете членка на НАТО и имате можност да пристапите во ЕУ, но предусловот е да се има успешен референдум на 30 септември порача германската канцеларка Ангела Меркел на заедничката прес конференција со премиерот Заев по средбата во Владата која траеше еден час.
Меркел е прва германска канцеларка која ја посетува Македонија изминативе 27 години, и тоа на денот кога се одбележува 8 септември – денот на независноста и во пресрет на референдумот за Договорот со Грција што треба да се одржи на 30 септември. „Посетата е охрабрување дека големите сили го подржуваат исполнувањето на Договорот со Грција и дека Договорот ја гарантира европската иднина и нашето место во ЕУ и НАТО. Охрабрени сме да го направиме историскиот исчекор“ рече Заев.
Меркел нагласи дека референдумот е шанса која една генерација ја има само еднаш во животот. Таа ги повика граѓаните на 30 септември да не седат дома.
„Овој референдум е историска шанса и не останувајте дома на ваков историски ден, излезете и кажете што мислите за иднината на вашата земја. 30 септември е клучен ден за иднината на вашата земја“ рече Меркел.
Одговарајќи на новинарско прашање, зошто Македонија би останала изолирана доколку не успее рефрендумот, Меркел рече дека прашањето за името и члентвото во ЕУ и НАТО се многу поврзани.
„Без решение за спорот за името, нема членство во НАТО и ЕУ, затоа што сите земји членки треба да гласаат,а ако прашањето не е решено нема да гласаат. Влезот во НАТО и ЕУ е возможен само ако успее референдумот и тоа не е закана, туку природна состојба, бидејќи сите членки на двете организации мораат да гласаат за прием на нов член.Важно е оваа поврзаност да биде јасна и тука нема никаква закана. На 30 септември луѓето ке гласаат дали ке се отвори вратата за да станат дел од семејството на НАТО и ЕУ и тоа бара прифаќање на Договорот со Грција. Ако референдумот е успешен, ќе станете членка на НАТО и на европското семејство“ кажа Меркел.
Меркел се залага да има што поголем одзив на рефeрендумот и рече дека „ сега не се занимаваме со тоа што ако не успее, туку се залагаме референдумот да биде успешен“.
Премиерот Заев верува дека посетата на Меркел ќе ги охрабри граѓаните да го направат „историскиот исчекор.
Меркел нема да се сретна со претседателот Иванов, а на претседателот на опозицијата Христијан Мицкоски ќе му порача дека „во една демократија за клучните прашања има заедничка, национална одговорност“.
Сојузна Република Германија е трговски партнер број 1 на Македонија – дури 47 проценти од вкупниот извоз оди кон Германија, а трговската размена е 3,5 милијарди евра. Меркел рече дека германската Влада и таа лично се залагаат за интензивирање на односите со Македонија и затоа Германија ќе испрати економски советник во Владата на Заев кој треба да помогне во реформите и ќе вложи 2,5 милиони евра за стручното образование во земјава.