Лидерот на ВМРО-ДПМНЕ, Христијан Мицкоски е убеден во убедлива победа на опозицијата на претстојните парламентарни избори. Потоа, како рече рече синоќа на средба со граѓаните на Кисела Вода, ќе следува засукување на ракави и да работа на обнова на Македонија.
„Изминатиот период чекоревме полека за да не паднеме, за да не се враќаме неколку чекори назад и да мора да почнуваме се одново. Меревме, премерувавме, носевме одлуки кои можеби секогаш не беа допадливи, но, тоа беа одлуки кои нас нè донесоа до крајната цел, а тоа е што побргу да ни се случат предвремени парламентарни избори“, рече Мицкоски пред граѓаните во општина Кисела Вода.
Сакавме да војуваме, рече, но, тоа да биде војна со извесен крај, а тоа е победа. Кога на човек ќе му се случи нешто лошо, рече тој, како што на Македонија и се случи оваа власт, не треба да се очајува, туку да се исправи и да продолжи да се бори во она што верува.
„Колку нашиот сон и она во што веруваме е поголемо, толку искушенијата до крајната цел се потешки и толку нашата борба е поисправна. Наша цел е онаа Македонија за која сонуваме, онаа Македонија која што ја наследивме и онаа Македонија која што сакаме да им ја оставиме на нашите потомци“, рече Мицкоски пред граѓаните во општина Кисела Вода.
Тој ги повика граѓаните на 15 јули да стават крај на, како што потенцира, корупцијата и на криминалот, на понижувањето на Македонија и да заокружат за број 14 на гласачкото ливче.
„Треба многу грешки да поправаме за некои ќе треба да делуваме брзо и одлучно, а за некои можеби ќе треба повеќе време“, рече Мицкоски додавајќи дека главната матрица на СДСМ е пред избори прво, да дојдат да кажат по некоја лага, второ, да направат национално понижување и криминал и трето, да ги перат гревовите.
Пред присутните се обрати и професорката Гордана Силјановска Давкова, носител на Изборната единица 1, која е убедена дека граѓаните ќе дадат поддршка за ВМРО-ДПМНЕ и коалицијата на овие избори. Рече дека претходните претседателски избори биле само вовед и отвориле порта за она што ќе се случува на претстојните парламентарни избори, а тоа е, потенцира таа, голема победа на коалицијата предводена од ВМРО-ДПМНЕ.
„Ќе се согласите дека не само во Македонија, туку и ширум светот, сите кои се Македонци сега се обединија околу најважните четири букви за македонската историја ВМРО и тоа го знаат. Го разбудија вмровскиот код во секој човек и никогаш не било попотребно и поважно национално единство како денес“, истакна таа.
Мора да сториме сè, потенцира Силјановска Давкова, за младите да останат тука и да се стави крај на кршењето на владеење на правото затоа што нема правна држава ако сите не се еднакви пред законот.