Ако Мицкоски не го загрижува тоа што со затворањето на фабриките илјадници семејства ќе останат без приход и на улица, ако на Премиерот на Нашата земја му е чудно работниците да јадат и да живеат како нормални луѓе, тогаш што го загрижува Мицкоски и што не му е чудно?
Јане Ѓорѓиоски
- Многу тешка дилема се распосла деновиве за тоа – кој повеќе е загрижен за работниците – сaмите работници и нивните синдикални организации, или премиерот Мицкоски. Најверојатно од жал дека се манипулира со работниците и нивното право на достоинствен живот, премиерот излезе со „своја понуда за синдикалната кошничка“. Па дилемата во јавноста е: Мицковата или Синдикалната кошничка. Според податоците на Сојузот на синдикати на Македонија, минималните трошоци на едно четиричлено семејство во јануари се зголемени за 391 денар во однос на декември. Во делот на храната и пијалоците се бележи зголемување од 123 денари. Вредноста на синдикалната минимална кошничка за само една година пораснала за 6.089 денари што значи зголемување од 10,63 проценти. Синдикалците од најрепрезентативната организација сметаат дека се оправдани нивните барања за зголемување на минималната плата и на сите останати плати и оти се потребни и други мерки од страна на Владата за да се заштити животниот стандард на граѓаните. Премиерот на Нашата земја, Христијан Мицкоски, пак, вели синдикалната кошничка е чудна, претерана и дека тоа не се „вистински цени“ од производи од потрошувачката кошница. Според Мицкоски се манипулирало при пресметката од страна на поранешни функционери од СДСМ. Тој ги обвини поранешниот министер Тевдовски и Бранимир Јовановиќ како креатори на синдикалната кошничка дека ствараат забуна. Јовановиќ тоа експресно го демантираше. Мицкоски буквално рече дека се брка луксуз со синдикалната кошничка. Вели дека тој сега не пробал грозје, диња, праска, цреши… не пиел нескафе, не пушел цигари. Или во превод – нема што тука некои работници со минимална плата да се луксузираат и уживаат во рабои што ни еден премиер не може да си ги дозволи.
- Дел од компаниите во слободната зона Бунарџик ја напуштаат Северна Македонија, дел пак ги намалуваат капацитетите. Компанијата „Аптив“ заминува од земјава, а Џонсон Мети најавува намалување на бројот на вработени. Колку работници ќе останат на улица сè уште никој не се осмелува да претпостави. Нашиот премиер Мицкоски не го загрижува заминувањето на странските компании од Македонија, туку тој бил загрижен, внимавајте, дали ќе има доволно работна сила за предвидените инвестиции – „Јас повеќе сум загрижен дали ќе имаме доволно работна сила за сите оние инвестиции кои што се во процес на инвестирање“, рече Премиерот.
ВО ЕДНО Ако Мицкоски не го загрижува тоа што со затворањето на фабриките илјадници семејства ќе останат без приход и на улица, ако на Премиерот на Нашата земја му е чудно работниците да јадат и да живеат како нормални луѓе, тогаш што го загрижува Мицкоски и што не му е чудно? Еве нам ни е многу чудно како со професорска плата Мицкоски станал косопственик на хидроцентрала. Многу ни е чудно, на пример, и како со таква плата поседува рачни часовници во вредност од над 60 илјади евра. На ДКСК ете тоа не им е чудно. Од друга страна, ако се земат овие работи во предвид и стајлингот (брендирана облека) на Мицкоски како репер, ич не траба да ни е чудно што на Мицкоски му се чудни нормални работи како барањата на работниците за повисоки плати за да може да си ги прехранат семејствата. Не знам што има пак сега да се чудиме што Мицкоски се чуди како може да јадат работниците овошје и зеленчук во зима и да пијат ни помалку ни повеќе туку нескафе и тоа цели лименки од 250мл. молам ви се лепо. Или, дека требало да биде загрижен Премиерот наш што ќе се затвораат фабрики и отпуштаат работници?!!
Ма, баш сме чудни што се чудиме!
Текстот е сопственост на Фронтлајн