Парламентарното мнозинство нема да ги поддржи двата предлог закони на опозицијата, за кои што координаторот на една од пратеничките групи на ВМРО ДПМНЕ Антонијо Милошоски побара од власта да поддржи, во замена за поддршка на опозицијата за трите предлог закони – за минимална плата, за стечајците и за укинување на радиодифузната такса, кои се на дневен ред на оваа седница, по скратена постапка.
Опоцијата бараше поддршка за предлог законот за покачување на платата на јавната администрација за 5% или за предлог законот за издавање ваучери за компјутери на студентите од износ од 300 евра.
-Од Министерството за финансии, односно Владата, добивме мислење за трите закони предложени од опозицијата, тоа беа три закони по скратена постапка, за покачување на платите во администрацијата, ваучери за студентите и за извршување. Двата предложени закони, за кои што денеска се бара согласност од нас, за покачување на платите и за ваучерите, не се прифатливи, од аспект на големината на сумите и од аспект на владината политика, бидејќи таа материја, во однос и на ваучерите и во однос на платите, се регулира со други политики на Владата и со други закони кои што допрва доаѓаат на дневен ред, рече Тунтев при што забележа дека, судејќи според големиот број пријавени дискутанти од опоцијата, 35, говори дека опозицијата сака да ја одолговлекува денешната расправа.
Милошоски рече дека владејачкото мнозинство на овој начин признава дека оваа година нема намера да го поддржи покачувањето на платата на јавната администрација и да им додели ваучери на студентите.
-Правите голема грешка кон студентите, бидејќи ваучерите за студенти од 3 година на пример се вкупно 4,5 милиони евар за 2018. Тие не би требало да бидат проблем, ако министерот за финансии тврди дека се очекува раст на економијата од над 2 проценти. Тоа што не поддржувате закони од интерес на сите граѓани покажувате дека немате интерес за потребите на граѓаните не зависно за кој закон се работи и од кае доаѓа, рече Милошоски.