Published: Friday, July 29, 2022 15:49
Министерството за надворешни работи денеска во скенирана верзија ја објави официјалната потпишана верзија од Протоколот од вториот состанок на Заедничката меѓувладина комисија со Бугарија.
Верзијата може да се види на овој линк
Шефот на дипломатијата, Бујар Османи со неговата колешка од Бугарија, Теодора Генчовска на 17. јули во Софија го потпишаа Протоколот.
Потписот на двајцата министри врз документот, кој е и записник од втората седница на Мешовитата македонско-бугарска комисија, се смета за отворање пат кон почеток на пристапните преговори за членство во ЕУ.
Што се однесува на добрососедските односи со Бугарија, Османи нагласи дека Европската комисија нема да дава извештаи, бидејќи Договорот за добрососедство и соработка во францускиот предлог не е патоказ.
– Сите коишто беа вклучени максимално се вложиле за да има проекти, меморандуми, документи со кои односите меѓу нашите две држави отвораат едно ново поглавје, во коешто во сите сектори ќе се поврзуваат луѓето, бизнисите, различните институции, со цел таа соработка да биде поблиска, поплодна, заснована на меѓусебна доверба, како блиски пријатели, како со сојузници во НАТО и се надевам во скоро и како сојузници во ЕУ, изјави министерот Османи пред околу две недели.
Во делот за измени во учебниците, во протоколот се посочува дека Комисијата за историски прашања ќе ги носи главните одлуки.
„При изучувањето, оригиналите на соодветните историски извори и литературни текстови, да бидат достапни, да се користат и презентираат од соодветните образовни институции. Сите идни резултати од работата на Комисијата ќе се објавуваат заеднички од двете држави во рок од шест месеци по усвојувањето на договорените текстови од Заедничката меѓувладина комисија по член 12 од Договорот за пријателство, добрососедство и соработка“, стои во Протоколот.
