Министерството за надворешни работи го одби барањето на руската амбасада за специјално одобрение за користење на воздушниот простор за лет до Белград, поради тоа што Владата веќе има донесено општа одлука за затворање на воздушниот простор на Северна Македонија за авио-превозници во сопственост на Руската Федерација, соопштија денеска од Министерството за надворешни работи.
Како што објавивме, посетата на шефот на руската дипломатија Сергеј Лавров на Србија е откажана, откако соседните земји соопштија дека го затвораат својот воздушен простор за неговиот авион, изјави висок функционер од руското Министерство за надворешни работи за руските медиуми.
Британските медиуми наведуваат дека изворот од руското МНР потврдил дека Бугарија, Северна Македонија и Црна Гора го затвориле својот воздушен простор за авионот со кој денеска Лавров требаше да допатува во Белград.
Прелетот не е дозволен поради санкциите воведени од поголем број држави од ЕУ и НАТО на кои се приклучи и Македонија откако Русија го почна нападот врз Украина.
Наместо да замине во Србија каде денеска требаше да биде во дводневна посета, шефот на руската дипломатија свика прес-конференција.