Министерството за надворешни работи на Грција денеска објави соопштение во кое го осудува учеството на македонскиот генерален конзул во Торонто, Јовица Палашевски на настан, кој го нарекуваат иредентистички и велат дека тоа е уште едно прекршување на Привремената Спогодба во која се исклучуваат секакви територијални претензии.
„Го осудуваме учеството на генералниот конзул во Торонто, Јовица Палашевски, на иредентистички настан. Тоа претставува уште едно прекршување на Привремената спогодба, која бара воздржување од каква било акција за поддршка на територијалните претензии. Новата влада на БЈРМ тврди дека се стреми кон нов почеток во односите со Грција. Сепак, и покрај промената на власта, се чини дека иредентизмот и понатаму е доминантна државна идеологија и секојдневна политичка практика во нашата соседна земја“, пишува во соопштението на Министерството за надворешни работи на Грција.
Од македонското МНР засега нема официјален одговор за овие обвинувања.
Од грчкото МНР засега нема потврда дали министерот за надворешни работи на Грција, Никос Коѕијас може да ја одложи посетата на Македонија закажана за 31 август.