Министерот Бујар Османи и неговата колешка од Бугарија, Теодора Генчовска заедно со тимовите на министерствата за надворешни работи денес одржаа работна средба како дел од дводневната работна посета во Северна Македонија, соопшти малку Министерството за надворешни работи.
„Разговорите протекоа во пријателска и конструктивна атмосфера во функција на продолжување на дијалогот меѓу двете министерства за надминување на отворените билатерални прашања согласно Договорот за пријателство, добрососедство и соработка и унапредување на евроинтеграцискиот процес на Северна Македонија“, се вели во соопштението.
Разговорите ќе продолжат и во текот на наредниот ден и дополнително ќе се интензивираат во периодот кој претстои во насока на изнаоѓање на взаемни решенија за остварување на споделената цел за унапредување на европската иднина на Северна Македонија.
„За време на средбата заеднички бил остро осуден инцидентот во Битола. Двете министерства ќе продолжат да наоѓаат взаемно прифатливи решенија и да ги унапредуваат билатерталните односи помеѓу двете земји“, порачаа од македонското МНР.
Министерката за надворешни работи на Бугарија Теодора Генчовска се наоѓа во дводневна работна посета на Македонија, која падна во сенка на опожарувањето на влезната врата на бугарскиот културен центар во Битола „Иван Михаилов“. Генчовска го прекина состанокот со Османи и замина за Битола од каде порача дека инцидентот нема да ги влоши односите со Македонија и дека откривањето на сторителите е шанса Македонија да покаже дека навистина вложува напори за борба против говорот на омраза спрема Бугарија.