Министерството за надворешни работи изразува длабоко извинување за ненамерниот пропуст при употребата на малото знаме на тет-а-тет средбата на двајцата министри при посетата на министерката Тања Фајон на земјава, кое беше едно од десетте државни обележја кои беа употребени за време на средбите, соопшти Министерството по бурата реакции во јавноста поради поставеното словачко наместо словенечко знаме на средбата на двајцата министри.
„Во исто време дозволете да информираме дека состанокот, како всушност и целата посета на министерката Фајон помина во исклучително позитивна и пријателска атмосфера со важни пораки кои беа разменети и на самите состаноци, но и испратени во јавноста“, се посочува во извинувањето.
МНР наведува дека гостинката, министерката за надворешни работи и вицепремиерка на Словенија Тања Фајон, ја прифатила и имала разбирање за грешката која била ненамерна, и притоа се додава дека згрешеното знаме не влијаело на средбите и успешноста на посетата.
Министерството за надворешни работи дополнително ќе ги зајакне протоколарните проверки со цел во иднина да не се повтори ваква ситуација, се вели во соопштението.