По изјавите на пратеникот и лидерот на бугарската политичката партија „Вазражадане“ Костадин Костадинов за време на конститутивната седница на Народно Собрание на Република Бугарија, македонското Министерството за надворешни работи, упати вербална нота до Министерството за надворешни работи на Бугарија, во која изрази крајно незадоволство од содржина на изјавата во која јавно изразуваат иредентистички и територијални претензии кон Република Северна Македонија, соопшти утринава МНР.
Ова е втора вербална нота за само една седмица, откако минатата недела европратеникот Ангел Џамбаски во специјално снимено видео, упати навреди и клевети кон премиерот Димитар Ковачевски и кон нашата земја.
„Го повторуваме апелот дека ваквите изјави се директно спротивни на интенцијата на двете држави да го почитуваат и да го негуваат духот на Договорот за пријателство и добрососедство, во насока на создавање блиски и пријателски односи базирани на меѓусебна почит и соработка. Токму во духот на добрососедството, очекуваме релевантните политички и институционални фактори во Република Бугарија да се оградат и да ги осудат ваквите провокации и обиди за нарушување на добрососедските односи“, се вели во нотата.
Бугарското Министерство за надворешни работи во реакција што ја објави на својата веб страница го осуди настапот на европратеникот Џамбаски и рече дека не оди во прилог на добрососедството со Македонија и на интересите, како што нагласи, на Бугарите во Македонија.
С.К.