Со слоганот „Секоја фискална сметка е важна“ од денеска почнува наградната игра „Мој ДДВ #Моја награда“. Граѓаните може да ги скенираат сите сметки, дури и оние на кои е изразено нула денари ДДВ, а кои ќе учествуваат во наградната игра. Наградниот фонд е пола милион евра, а ќе се доделат 3.852 парични награди на дневна и месечна основа и две главни награди.
Дневна основа ќе се доделуваат четири награди по 1.000 денари, три награди по 2.000 денари и три награди по 3.000 денари. Наградите ќе се извлекуваат по електронски пат, известувањето ќе се добива веднаш по скенирање на сметката, а граѓаните средствата ќе ги добијат на трансакциска сметка.
Месечно се предвидени 15 награди по 100.000 денари. Ќе учествуваат фискални сметки во периодот на еден месец од едно до друго извлекување, но не и оние што веќе биле добитни на дневна награда. Датумите на извлекување се веќе објавени, а првото ќе стартува на 4 јануари, веднаш по лото извлекувањето што се емитува на Канал 5 телевизија.
Доделувањето на главните награди по 3.000.000 денари ќе се одвива во посебни емисии на 18 март и на 19 декември во 2020 година.
Наградната игра ќе трае до 14 декември 2020 година, а според министерката за финансии Нина Ангеловска се очекува да даде резултат во намалување на сивата економија.
„Граѓаните кои скенираат фискални сметки ќе имаат трикратна корист. Ќе имаат шанса да добијат една од 3.852-те награди со вкупен фонд од пола милион евра. Ќе добиваат поврат на ДДВ и ќе придонесуваат во борбата против сивата економија која во нашата држава изнесува една третина“, рече министерката за финансии на прес-конференција на која го најави стартот на наградната игра.
За учество во наградната игра, граѓаните најпрво треба да се регистрирани во системот е-Персонален данок, да се корисници на апликацијата „МојДДВ“, каде се појавува известување за наградната игра при што треба да се прифатат условите за учество.
Во тек е првата исплата на поврат на ДДВ на граѓаните за месеците јули, август и септември, откако почна наградната игра.