Хашкиот трибунал денеска ќе ја изрече пресудата по жалбата на бившиот началник на Генералштабот на војската на Југославија, Момчило Перишиќ.
Во септември 2011 година, Перишиќ беше осуден на 27 години затвор. Тој е прогласен за виновен во помагање и подржување на убиства, нехумани дела, напади врз цивили и прогони во Сараево и Сребреница, во периодот од август 1993г. до ноември 1995г. како и за пропуст дека како надреден, не ги казнил одговорните за ракетните напади врз Загреб во мај 1995г.
Тоа е прва пресуда во која Трибуналот прогласил вина за официјално лице од Сојузна Република Југославија за време на воените злосторства во Босна и Херцеговина. За злосторствата направени во Хрватска, осудени се службениците на ЈНА, Миле Мркшиќ, Веселин Шљиванчанин, Павле Стругар и Миодраг Јокиќ.
Во жалбената постапка, при крајот на октомври минатата година, застапниците на одбраната и обвинителите беa повикани да одговорат на прашањата дали кадровската, логистичката и материјалната помош која Перишиќ им ја давал на српската војска во Хрватска и БиХ, била со цел да ги помага и подржува злосторствата, или само ги подржувал нивните воени напори.
Првичниот обвинителен акт против Перишиќ пред Трибуналот, беше покренат во февруари, а објавен на 7 март 2005г. кога Перишиќ доброволно се предаде и во истиот ден беше префрлен во надлежност на Меѓународниот кривичен суд за поранешна Јуогславија.
Конечната пресуда ќе ја достави жалбената комисија, со која претседава претседателот на Трибуналот, американскиот судија Теодор Мерон.