Министерството за образование и наука одговарајќи на прашања од НоваТВ, за медицинските и немедицинските причини врз основа на кои еден ученик може да биде ослободен од следење на настава со физичко присуство и кој е компетентен да ја прави оваа селекција, уште еднаш појаснија дека „во вакви ситуации, учениците односно нивните родители/старатели преку непосреден контакт со наставниците и раководството на училиштето ќе носат заедничка одлука за вклученост на ученикот во наставата преку друга форма“.
– Медицинска причина се докажува со достава на медицинска документација од овластена здравствена установа. Додека пак, немедицинска е секоја причина која не произлегува од одредена хронична болест на ученикот или член во семејството, атипичен развој на ученикот и слично, но сепак иницира оправданост за да може ученикот да не посетува настава со физичко присуство во училница како би се намалиле евентуалните ризици од дополнителни компликации на состојбата, велат од Министерството за образование и наука.
Оттаму потсетуваат дека на предлог на Министерството за образование и наука, а со одобрување на Комисијата за заразни болести, на 99та седница на Владата е донесена одлука учебната 2021/2022 година да започне со физичко присуство, со полн капацитет, според утврдените и донесени протоколи и дека наставата со физичко присуство е најдобрата опција за задоволување на интересите на учениците, влијае на квалитетот на стекнатите знаења, на социјализацијата и психофизичкиот развој, а воедно и дека тоа е препорака на УНИЦЕФ како организација која работи на заштита и унапредување на детските права.
– Исклучоци од оваа одлука, може да се однесуваат на деца со ретки болести или попречености, деца кои доаѓаат од хронично болни семејства, по барање на родителите, како и други немедицински причини со дозвола на училиштето“.се наведува во одговорот на МОН за НоваТВ.
Поради сеуште присутната пандемија и неможноста до крај прецизно да се предвиди развојот на ситуацијата, Владата организира две дополнителни сценарија:
– Преминување на целосно онлајн настава или примена на комбиниран модел.
МОН постојано упатува апел за доследно почитување на протоколите од сите засегнати страни, со цел наставата со физичко присуство да се одржи колку што е можно подолго и од која засега нема отстапување.
Мирјана Трпческа