Обвинителката Фатиме Фетаи денеска на судењето за Монструм го распрашуваше обвинетиот Хаки Азири, кој во текот на истрагата сведочеше за тоа како се случило петкратното убиство, но подоцна се предомисли и кажа дека тогаш сведочел под присила. Денеска, на прашањето, дали сега се плаши, тој одговори:
-Сега немам таков страв, се смени режимот и сега државата е послободна, рече Азири.
Тој својот исказ го започна со тврдењето дека исказот даден пред истражниот судија не важи, не важат ниту саатите, датумите, имињата, местата.
Обвинетиот Азири на почетокот на постапката имаше својство на заштитен сведок, но потоа го смени својот исказ и доби статус на обвинет.
Денеска Азири пред судот говореше зошто се откажува од овој исказ. Како што рече дека не сакал да прифати друг идентитет ниту да биде однесен во Холандија, туку побарал да биде изнесен пред судијата, да се потпише каде што треба затоа што многу се плашел. Пред судот тврдеше дека не знаел оти добил статус на заштитен сведок, туку само се грижел за својот живот и за животот на семејството.
Истата изјава што ја дал пред истражниот судија требало да ја каже и пред суд, но, како што рече, одлучил да го смени исказот по што добил статус на обвинет и денеска заедно со уште петмина обвинети му се суди за петкратното убиство.
Азири упорно се држи до тезата дека полицијата му ја спремила изјавата, која тој ја даде за време на истрагата, односно кога посведочи за тоа како се случило петкратното убиство.
Тој го посочи името на Радникот како човекот со повисок полициски чин кај кого бил однесен во зградата во МВР, откако претходно бил држен во Кочани. како што рече, тој му рекол дека мора да ја потпише веќе подготвената изјава за убиството и пред судот да го каже тоа што го пишува на листот.
Притоа Фетаи му посочила слика на својот мобилен телефон од Радникот, односно од Љупчо Тодоровски поранешниот дитректор на БЈБ, а обвинетиот потврдил дека тој е таа личност, додавајќи дека тој е човекот што му рекол дека сите судии и обвинители се нивни, па затоа мора да се придржува до напишаната изјава.
Обвинителката го прашуваше за тврдењата дека бил тепан, односно дали имал повреди од тепањето, на што Азири рече дека имал болка и црвенило по телото, а не знае дали имал видливи повреди на лицето. На забелешката на обвинителката да каже „дали малку или многу го тепале“, Азири рече дека според него , многу го тепале.
Поради тоа што обвинителката Фатиме неколку пати му се обрати на обвинетиот со повисок тон, откако тој не одговараше на нејзините прашања, реагираше адвокатот Насер Рауфи кој побара таа да го смени односот.