Рускиот борбен авион што турските сили го соборија на 24 ноември не претставувал закана ни за Турција ни за нејзините граѓани, соопшти денеска заменик- шефот на руските воздухопловини сили Сергеј Дронов.
Тој на прес конференција рече дека има докази дека авионот не го повредил турскиот воздушен простор, но дека црната кутија е оштетена, бидејќи ракетата ја погодила опашката на авионот, и оти податоците ќе се извлекуваат со специјална опрема. Дронов најави дека првите информации за летот ќе бидат соопштени в понеделник.
Русија исто така побарала британски, кинески и индиски дипломати да бидат сведоци на отворањето на црната кутија, а 14 земји да испратат експерти за истрагата. Засега, според Дронов, на повикот се оѕвале само стручњаци од Британија и Кина.