Марк Маркез ја прослави третата победа во Мото ГП шампионатот во оваа сезона. Возачот на Репсол Хонда беше најбрз во денешната трка во Брно за Големата награда на Чешка со време 44:15,974 минути.

Како решавачка притоа се покажа неговата одлука за смена на моторот поради брзото сушење на асфалтот. Од истата причина во бокс влегоа и останатите конкуренти за највисок пласман, но круг или два по Маркез кој за тоа време создаде предност и не дозволи да биде загрозен до крајот.

Покрај Маркез, на подиумот се најдоа уште двајца шпански мотоциклисти. Второто место, со заостанување од 12,5 секунди, го освои Дани Педроса на Репсол Хонда, трет беше возачот на Јамаха, Маверик Вињалес (+18 секунди).

Маркез е водечки во генералниот пласман со 154 бода пред Вињалес со 140 и Андреа Довициозо со 133.

Наредната трка во Мото ГП шампионатот ќе се вози на 13 август за ГН на Австрија.