Периодот што следува може да биде период на најголема мигрантска криза од Втората светска војна до денеска. Ова е заклучокот од брифингот на МАРРИ што се одржа во Министерството за надворешни работи.
За активностите на регионалната иницијатива за азил, бегалци и миграција зборуваа министерот за внатрешни работи, Агим Нухиу и амбасадорката на Србија во Македонија, Душанка Дивљак Томиќ.
„Иако оваа тема не зазема исто место на агендите на регионалните и меѓународните собири како што беше пред една година. Сепак, треба да признаеме дека заканите се објективни и можноста за повторување се реални, па затоа сите заедно треба да бидеме подготвени да пружиме сеопфатен регионален одговор под закрила на нашите партнери од ЕУ“, рече Нухиу.
Оваа година со МАРРИ претседава Србија. Мигрантската криза беше главна тема на средбата меѓу претседателот Ѓорге Иванов и претседателот на Европскиот совет, Доналд Туск.
Амбасадорката на Србија како земја актуелен претседавач со иницијативата Душанка Дивљак Томиќ истакна дека како транзитна земја која се наоѓа на средината на Балканската рута е една од оние земји кои се најосвестени за овој проблем.
„Од МАРРИ како уникатна иницијатива очекуваме да обезбеди не само стручна помош, планирање заеднички акции туку и конкретен придонес за создавање конкретни акциони планови, како и поддршка на координацијата и импелментацијата со постоечките механизми на сите учесници на МАРРИ. Од партнерите на МАРРИ очекуваме да ги вложат своите напори и да ги понудат најдобрите решенија за мигрантската криза“, рече амбасадорката Дивљак Томиќ.
За буџетот за МАРРИ Иницијативата за 2017 година се предвидени 500.000 евра. Во јуни годинава треба да биде усвоена и стратегијата за 2017-2020 година. Следен претседавач со иницијативата е Албанија.