Алексис Санчез заработува богатство во Манчестер јунајтед со кој има договор до 2022 година. Чилеанецот, според „Сан“, моментно има неделна плата од 505.000 фунти, но англиските медиуми често пати знаат да го пецнат дека повеќе „настапува“ одошто игра. При трансферот од Арсенал беше окарактеризиран како наследник на Дејвид Бекам, а наместо тоа се претвори во грејач на клупата. Додуша и повредата на тетивата го забави неговиот придонес во тимот од „Олд Трафорд“.
Зад „црвените ѓаволи“ се 26 меча во Премиерлигата во оваа сезона или 2.340 минути без судиските надополнувања. Санчез во нив запиша 615 минути, па порталот TheSportsman.com се впушти во пресметка од која произлегува дека секоја минута мината на терен заработува 15.601 фунти или нешто помалку од 18.000 евра или во превод една секунда му носи 300 евра. Колку за илустрација, неделната плата на Маркус Рашфорд е 45.000 фунти и во оваа сезона тој одигра 1.525 минути.
И на крајот споредба на ефектот на двајцата. Рашфорд на контото во оваа сезона има девет гола и седум асистенции додека Санчез е на една реализација и три додавања.