За несвесната грешка на 27 април си го одлежав своето. Жал ми е што вие не одговарате, рече пратеникот Крсто Мукоски од независната пратеничка група на ВМРО-ДПМНЕ, во реплика на Антонио Милошоски од ВМРО-ДПМНЕ, кој во дебатата за законот за јавно обвинителство го критикуваше за собраниските настани од 27 април, забележувајќи и дека СДСМ претходно ја обвиниле фирмата на Мукоски за криминал што денеска не е случај.
„Што се однесува до 27 април, ќе ви кажам неколку збора. Крсто Мукоски за таа несвесна грешка што ја направи си го одлежа своето. Жалам што такви како тебе кои ги упатуваа луѓето горе да го направат тоа што го направија, а ќе ве потсетам на една изјава што беше дадена од сведок кој во моментот е во бегство, не барајте го Љубен Арнаудов, качете се горе, целта е Заев“, наведе Мукоски.
Многу ми е жал, рече Мукоски, за партијата ВМРО-ДПМНЕ „која што вие не можете да ја присвоите пред мене бидејќи можеби и пред вас сум нејзин член“.
„Жал ми е што ВМРО-ДПМНЕ денес е заложник на двајца, тројца криминалци како вас и се претвори во партија од примерот на Златна Зора во Грција или радикалите на Шешељ. Тоа не беше фундаментот или основата на ВМРО-ДПМНЕ од самото основање на партијата. Патот на ВМРО-ДПМНЕ е патот кон евроатлантските структури“, рече Мукоски.
Тој истакна и дека не очекувал Милошоски така да ја почне денешната дебата, оценувајќи ги неговите денешни тврдења како типичен пример на уплашен човек, криминалец кој знае дека еден ден треба да одговара пред законите на оваа држава. Во однос на фирмата за која го прозива Милошоски, посочи дека инспекциите и Управата за јавни приходи, иако вршеле контроли, не нашле ништо.
„Кога зборувате за фирмата „Атриум“, да ви кажам неколку збора. Таа фирма постои од 1974 година кога сум роден. Работела во Словенија до распадот на Југославија во 1990 година. Земала тендери од многу власти во оваа држава и ќе зема тендери на легален и законит начин. Тоа што го споменавте кога СДСМ дојде на власт, да точно е, обвинуваа, меѓутоа фирмата ја тресеа шест месеци и УЈП и финансиска полиција и сите можни инспекции и не најдоа ништо. И денес ве молам на ова обвинение да го пријавите овој случај повторно нека дојдат да испрашуваат“, одговори Мукоски на обвинувањата од Милошоски.