По најавата на Министерството за култура дека ќе прави ревизија на ценовникот за музика на здружението на македонските музички изведувачи и продуценти.
„Министерството за култура треба похрабро да излезе со став и да го заштити правото на изведувачите и на продуцентите. На сите напади и клевети кон Македонската музичка индустрија-ММИ, често пати неосновани, очекувавме поголема заштита од Министерството. Требаше да заземат појасен и поконкретен став дека ова право е право кое мора да се остварува. Министерството е тоа што ги пропишува правилата како тоа да се прави и дека тоа треба да се оствари“, ова денеска го истакна Бодан Арсовски, извршен директор на ММИ, кој рече дека се најавува и менување на Законот, кој досега воопшто не заживеа, а веќе се менува, што, според него, е чудно.
Според него, искуствата од регионот покажуваат дека заштитата на колективните и сродни права е единствениот и вистинскиот пат кон модерна заштита на интелектуалната сопственост, што Европската унија ја очекува и од Македонија.
Паоло Свеци, директор на Хрватското здружение на изведувачи праша дали е праведно некој во Македонија да заработува од музика, а да не мора да плати.
– Разочаран сум што политичарите во Македонија го опструираат спроведувањето на законот. Осумдесет до деведесет отсто од програмата на радио станците е музика, а тие не сакаат да платат за користење. Тоа се минимални трошоци. Во Хрватска имавме кампања – цел ден музика во кафулињата по цена на едно кафе или весник, вели Свеци.
Грегор Штиберник од Здружението на изведувачи на Словенија, рече дека ниту едно кафуле во Македонија не е без пари за да не може да плати цена за музика колку што е цената на едно кафе.
– Најбитен елемент на некоја современа земја е интелектуалната сопственост и Македонија ќе се разликува од другите земји по својата музика, храна итн. Според истражувањата, музиката е побитна од ентериерот во кафулето. Се што бараат изведувачите и производителите на фонограмите за своите сродни права од радио станциите е четири пет отсто од приходите да користат за користење 80 отсто музика, рече Штиберник.
Тој потенцира дека во Словенија радио станциите плаќаат 50 центи за еден час музика, а во Македонија таа цена би била уште пониска.