Со зборовите „Нека се тркала“ на директорот на МКЦ, Златко Стефковски и прикажувањето на музичкиот документарец „Меѓу два урагана – THE ROLLING STONES“, изработен по повод 50 години постоење на легендарниот рок-бенд, започна 12-то издание на Фестивалот на европски филм „Синедејс“.
Под мотото „Европа тоа го прави најдобро“ во пет кино-простории, публиката ќе може да проследи вкупно седум програми (како и работилници, предавања, перформанси и средби).
Помеѓу програмите на овогодинешниот „Синедејс 2013“, со филмот на Брет Морген за Стоунси, започна и делот на музички документарни филмови селектирани од Тони Шариќ, директор на меѓународниот фестивал „Дорф“ од Хрватска. Во програма се:
1. Меѓу два урагана – THE ROLLING STONES (14 ноември 2013 Милениум и Фросина): Филмските работници кои работеа на „Меѓу два урагана“ успеаја да соберат повеќе од 1.000 часа видео-снимки и 500 часа аудио-записи така што добија пристап до исфрлените делови од речиси сите документарни филмови за „Ролинг Стоунс“.
2. Дамир Авдиќ – Вистинскиот човек за капитализмот (15 ноември 2013 Џебно кино МКЦ): Документарниот филм зборува за Дамир Авдиќ, босански музичар, поет и писател кој живее и твори во Словенија. Застанат среде сцената, сам, вооружан само со гитара и со сопствениот глас тој пее за војната во Босна, откривајќи го нејзиниот безмилосен пустош.
3. Апокалипса – Турнеја на Бил Калахан (16 ноември 2013 Џебно кино МКЦ): Бил Калахан е навистина неверојатен музичар и овој филм ќе ги израдува сите оние кои ја ценат добрата музика и снимањето звук.
4. Помешани со странци (17 ноември 2013 Кино Фросина МКЦ): Филмот што Том Бернингер конечно го создава е смешен и трогателен поглед на двајца многу различни браќа и претставува еден необичен, но неверојатно емотивен портрет на еден популарен и малку поразличен бенд.
5. Гензбург за Гензбург: интимен автопортрет (18 ноември 2013 Џебно кино МКЦ): Интимен и емотивен портрет на човек кој растел под силно влијание на доминантниот татко и живеел како еврејско дете во Франција под нацистичка окупација.
6. Загубен звук (19 ноември 2013 Џебно кино МКЦ): Фасцинантен документарец за губењето на слухот. И самата, делумно глува, режисерката Линдзи Драјден ги прикажа животите на еден музички критичар, на една танчерка и на една пијанистка – нивниот заедички хендикеп е губењето на слухот…сте се запрашале ли некогаш: што ако ја загубам способноста за слушање музика?
7. Како влеговме во Европа – Случајот СехА (20 ноември 2013 Џебно кино МКЦ): SexA е веројатно најдобриот хрватски noise бенд, воопшто. Тоа е и бенд чијашто кариера требаше да добие залет со помош на моќниот Стив Албини…но доаѓа војната. Филмот на Инес Плетикос е воедно и победник на овогодинешниот фестивал „Дорф“.
8. Пунчке (20 ноември 2013 Џебно кино МКЦ): Не сакајќи да се ограничуваат само на еден музички правец, Punčке денес во своите песни комбинираат различни влијанија и создаваат поинаков звук од оној што беше на почетокот, а публиката често ги опишува како инди-поп бенд кој се движи на линија помеѓу Television, Joy Division, Patti Smith и други.
9. Буквално се: музиката и ерата на Грент Харт (21 ноември 2013 Џебно кино МКЦ): Овде го имаме Грент Харт, 100 % нерафиниран и спонтан. Поранешниот песнописец, пејач и тапанар на Hüsker Dü, ве воведува во неговиот свет со едно негово старо интервју, во кое веднаш ја исклучува можноста за какво било повторно собирање на Hüsker Dü и се жали, седнат зад своите тапани во годините на зенитот на популарноста на овој легендарен средноамерикански панк бенд.
10. Duran Duran: UNSTAGED (23 ноември 2013 кино Фросина): Концертот на „Дјуран Дјуран“ во режија на Дејвид Линч е премногу необичен за да не се погледне.
Селекцијата на Шариќ изобилува со талентирани режисери, а најголемото име кое се појавува во оваа категорија е Дејвид Линч, како режисер на последниот филм кој што ќе се прикажува од музичките документарни филмови, „Duran Duran: UNSTAGED“. Линч е три пати номиниран за Оскар за „најдобар режисер“ во неговата кариера, и еднаш за „адаптирано сценарио“. Неколку пати е номиниран за Златен Глобус, а добитник е на награди од многу филмски фестивали.
Фестивалот CINEDAYS ќе се одржува од 14 ноември до 23 а е поддржан од Градот Скопје, Министерството за култура и Делегацијата на Европската унија.