За ова дело, насилство, одредбите од членот 386 од Кривичниот законик предвидуваат казна затвор од три месеци до три години.
Синоќешниот напад врз претседателот на РКЕ, Марко Бислимоски, е расчистен, а на напаѓачот, Аријанит Џафери, кој го признал делото, му е поднесена кривична пријава за насилство, информираат од полицијата.
– Во врска со случајот кој синоќа, околу полноќ, во СВР Скопје го пријави М.Б. (45) од Скопје дека на тераса од угостителски објект на подрачјето на Центар бил физички нападнат од А.Џ.(28) од Скопје, ја известуваме јавноста дека случајот е целосно расчистен и против А.Џ. ќе биде изготвена кривична пријава за кривично дело насилство по член 386 од КЗ, соопшти МВР.
Веднаш по пријавувањето на настанот, се вели во соопштението, преземени се соодветни мерки за расчистување, односно изготвено е писмено известување до ОЈО Скопје, извршени се разговори со сведоци на настанот, обезбедена е видео снимка, извршен е разговор со пријавениот А.Џ., кој во целост го призна делото, и по консултација со јавен обвинител ќе биде изготвена кривична пријава за кривично дело насилство по член 386 од КЗ.
За ова дело, насилство, одредбите од членот 386 од Кривичниот законик предвидуваат казна затвор од три месеци до три години.
Аријанит Џафери, инаку син на партиски функционер од ДУИ, Муса Џафери, е сопственик на фирмата „У Пауер“, којашто се наоѓа на листата фирми на Регулаторна комисија за енергетика (РКЕ) за одземање лиценци на снабдувачи на електрична енергија, бидејќи навреме и во целост не ги обезбедиле количествата на струја до потрошувачите со кои склучиле договори.
Од РКЕ претходно денеска соопштија дека претседателот на РКЕ, Марко Бислимоски, е добар, колку и да е тоа соодветен збор по инцидентит кој се случи синоќа каде тој беше нападнат во центарот на градот. Нападот е пријавен во МВР.
– Сакам да ја информирам јавноста дека како и досега, така и отсега, РКЕ ќе продолжи да работи транспарентно, согласно законот, затоа што основен постулат во нашето делување е заштита на потрошувачите и обезбедување на сигурност и стабилност во електро-енергетскиот систем. Единствено по што се водиме е словото на закнот, така и ќе продолжиме да ги водиме постапките врз основа на силата на аргументите, а не на физичка сила, изјави портпаролката на РКЕ, Марина Узунов.