Педесет полицајци со 10 моторни возила од Единицата за специјални задачи и 120 полицајци со 15 моторни возила од Единицата за брзо распоредување трагале по авионот што вчера се урна во близина на селото Кожле, соопшти МВР.

Службените лица на терен излегле веднаш во 18.45 часот, по известување од жител на селото кој во СВР Велес пријавил дека слушнал експлозија.

Откако бил пронајден авионот, полициски службеници од Единицата за брзо распоредување го обезбедиле местото на настанот и известиле јавен обвинител од Основното јавно обвинителство Скопје, кој излегол на местото на настанот и направил увид. Како што информираат од МВР, поради немање услови за работа, увидот продолжил денеска.

– На 6 септември 2016 година, во 17.36 часот, дежурен полициски службеник од регионалниот центар за гранични работи Север, во Единицата за известување и команда при СВР Скопје пријавил дека од аеродромот „Александар Велики“ на 10 километри кон Велес се изгубил комерцијален авион со шест патници во него. Според првичните информации од контролата на летање, известено е дека авионот бил приватен, од типот „пајпер па 34 “ со германски регистарски ознаки и дека полетал од Тревизо, Република Италија, а крајната дестинација му била Приштина. Над Република Македонија требало да изврши прелет и бил пријавен на аеродромот „Александар Велики“ во Скопје за дополнување гориво. Околу 18.45 часот телефонски од СВР-Велес е добиена информација дека жител од селото Кожле пријавил во СВР Велес дека во атар на селото, општина Петровец-Скопје, слушнал експлозија, по што, околу 20 часот, полициски службеници од полициската станица Петровец и жители од Кожле ги пронашле остатоците од авионот на место Јеловица во атарот на селото. Од извршениот преглед на терен пронајдени се делови од авионот и тоа крило со една гума, метална електронска кутија, два мобилни телефони, карти за патување и една италијанска патна исправа, се наведува во соопштението.

Во текот на ноќта била формирана стручна екипа составена од јавен обвинител, претставници од Судска медицина, истражители од Комитет за истражување на воздухопловни несреќи и сериозни инциденти, како и полициски службеници од Оддел за криминалистичко-технички испитувања и вештачења на МВР, единицата за увид при СВР Скопје, УПС од СВР Скопје, Единица за насилен криминал, Одделение за крвни и сексуални деликти, потраги и ЦПС. Во 6 часот наутро екипата се упатила кон местото на незгодата за да ги продолжи активностите за обезбедување на местото на настанот, вршење увид и идентификација на починатите лица, како и обезбедување докази за причините за авионската незгода и за смртта на патниците.

– Утринава екипите кои се упатени на местото на настанот, поради лошите теренски услови, во 10 часот пристигнале, а во 10.30 часот почнале со обезбедување на локациите за крим-техничко одбележување на трагите. Министерството за внатрешни работи во координација со другите надлежни институции презема мерки и активности за утврдување на сите поединости околу авионската несреќа и целосно документирање на настанот“, се вели во соопштението на МВР.

Засега нема информации за причините за несреќата во која загинаа пет мажи и една жена, кои патувале од Тревизо, Италија, преку Скопје до Приштина со авион „пајпер“. Малиот авион се урнал 4 минути пред слетувањето на скопскиот аеродром, на два километри од селото Кожле во општина Петровец.

Италијанските и косовските медиуми ги објавија имињата на загинатите. Со авионот управувал пилотот Франческо Монтањер кој бил претседател на аеро-клубот во Тревизо. Во авионот се наоѓале и потпретседателот на клубот Дарио Бастасин, како и Лука Дале Муле, италијанката Илариа Берти, косовецот со италијански пасош Висар Бегај, како и неговиот брат Ф.Бегај.

Паднатиот авион бил дел од група составена од три авиони кои летале од Тревизо за Приштина, а претставниците на италијанскиот аеро-клуб требало да отворат сличен спортски клуб и во Косово, пишуваат италијанските медиуми.

На приштинскиот аеродром немало гориво какво што е потребно за авионот Пајпер, па морал да слета во Скопје, а потоа да го продолжи летот. Синоќа беа пронајдени остатоци од авионот, а јавен обвинител треба денеска да изврши увид, бидејќи синоќа теренот беше тешко пристапен поради временските неприлики. Контролата на летање на скопскиот аеродром го пријавила исчезнувањето на авионот во МВР, вчера во 17.40 часот.