Македонија нема ниту еден игран филм во некоја од програмите на престојниот Кански филмски фестивал, но, по четврти пат ќе учествува на филмскиот маркет на фестивалот, кој се одржува од 15. до 24 мај. На штандот ќе го промовира филмот „Трето полувреме“ на режисерот Дарко Митревски.
Во „Шорт филм корнер“, пак, од Македонија ќе учествуваат два филма – документарецот „Трагачи по звукот“ во режија на Сузана Диневски, поддржан од Филмскиот фонд, и независниот филмски проек „Врати“, снимен во Битола, на Микеле ди Ангелис од Италија.
Директорот на Филмскиот фонд, Дарко Башески вели дека за претставувањето во Кан е подготвен каталог за филмската продукција во 2012/2013 и како и изминатите години- брошурата за промоција на Македонија како дестинација за снимање филмови.
Целта, според Башески е на завршените филмови и на тие што се при крај да им се отвори пат до филмските фестивали, а на филмовите во подготовка да им се помогне да најдат продуценти од други земји.
Фондот денеска распиша Конкурс за прва верзија на ново сценарио. Конкурсите за развој на сценарио во изминатите три години беа распишувани за време на фестивалот „Браќа Манаки“, но оваа година е многу порано за тие што ќе бидат поддржани од Фондот да имаат време да аплицираат во октомври на новиот, годишен конкурс за поддршка на филмски проекти.