На македонско-грчката граница од вчера од 18.30 часот е мирно. Во вчерашните нереди има повеќе од 250 повредени бегалци, а според МВР повредени се и 23 припадници на полицијата и АРМ, а оштетени се и три полициски и пет армиски возила.
Обидот на бегалците да ја преминат грчко-македонската граница траел неколку часа. Стотици мигранти, по проширувањето на гласини во Идомени дека Македонија ќе ја отвори границата, прво во близина на кампот демонстрирале мирно со барање за отворање на границата. По разговорот со грчката полиција, петмина бегалци дури се согласиле да отидат на границата и да преговараат со македонските власти.
Според раководителот на кампот за прием на бегалци од македонска страна, Зоран Лазаровски имало три групи бегалци од по околу 500 луѓе, кои се обидувале да ја пробијат границата на три различни места, на што македонската полиција одговорила со солзавец. Полицијата, како што се вели, го сторила тоа за да се заштити, поради тоа што била гаѓана од страна на бегалците со камења и метални предмети.
Според МВР во нередите учествувале повеќе од 3000 мигранти и дека во текот на целото време грчките полициски службеници не интервенирале во нивно спречување.