Светската фудбалска асоцијација (ФИФА) ја казни Албанија со 30,000 швајцарски франци за некоректно однесување на нејзините навивачи за време на натпреварот против Македонија во Струмица во квалификациите за СП 2018. Покрај скандирања со политичка содржина, групата од околу 300 гостински фанови на трибините на стадионот„Младост“ употреби и пиротехнички средства што предизвика доцнење на почеток на полувреме. Освен паричната казна, фудбалскиот сојуз на западниот сосед доби и опомена од ФИФА.
Парична казна и опомена и за Фудбалската федерација на Македонија (ФФМ). Сумата е за шест пати помала од албанската (5,000 евра), причината иста. Некоректно однесување меѓу дел од домашните фанови.
За Албанија ова е седма парична казна од ФИФА и шеста опомена во осумте настапи на нејзината фудбалска репрезентација во мундијалскиот циклус за Русија. Недоличното однесување на албанските навивачи против Македонија во Скадар ја чинеа Федерацијата 50,000 франци, против Шпанија и против Лихтенштајн по нови 25,000 франци, против Израел – 10,000 франци, против Италија – 100,000 франци за првиот меч и уште 5,000 франци во реваншот или вкупно 215,000 франци на име казна за поведенијата на т.н. „12 играч“ во фудбалот.
Македонија, пак, по петти пат се најде на дисциплински тапет во ФИФА. Првиот пат (Скадар) мина само со опомена, за останатите четири меча беше одредена вкупна казна од 22,500 швајцарски франци од кои 5,000 отпаѓаат при гостувањето на „азурите“ во Скопје, потоа 7,500 франци при гостувањето на „црвената фурија“, во мечот со Албанија – 5,000 франци и уште толку за време на дуелот со Лихтенштајн во Вадуц. Сето тоа како последица на однос на навивачите.