Најмалку девет луѓе починале поради околности поврзани со снежната бура којашто го зафати североистокот на САД, а без снабдување со електрична енергија според процените изнесени во неделата останале околу 70о илјади домаќинства.
Три лица загинале во сообраќајни несреќи поврзани со лизгави коловози и снегот, двајца мажи колабирале обидувајќи да го исчистат снегот, едно дете и еден помлад маж се задушиле со јаглероден моноксид додека се обидувале да се загреат во автомобил а два постари мажи се загубиле од нивните домови а потоа биле пронајдени смрзнати.
Бурата којашто зафати извонредно широко подрачје кое се протега од Големите езера до Атлантикот донесе врнежи до 90 сантиметри снег на американскиот североисток, соопшти националната метеоролошка агенција. Покрај жртвите во САД, најмалку уште три лица во несреќи предизвикани од невремето загинале во соседната Канада, пренесува макфакс.
Во центарот на бурата се американските области во државите Конектикат и Масачусетс, како и Род Ајсланд.
Покрај во овие области, вонредна ситуација е прогласена и во државите Њујорк и Мејн. Издадено е и предупредување за подигање на бранови и поплави во крајбрежните делови.
Властите во североисточните американски сојузни држави наредија на сите возила, освен оние на вонредните служби, да не излегуваат на патиштата.
Во Портланд и Мејн паднале 73,2 сантиметри снег, најмногу од 1979 година, а кај местото Катиханк во државата Њујорк измерена е брзина на ветрот од 133 километри на часа.
Околу 700 илјади домаќинства во девет сојузни држави се без електрична енергија, поради тоа што влажниот и тежок снег ги урива гранките од дрвјата врз далноводите.
Густиот снег во овој дел од САД, во кој живеат околу 40 милиони население, почна да врне во петокот попладне.